淡出娛樂圈十幾年、曾參選1986年港姐但落選嘅林其欣，噚日下晝3點，俾讀者李小姐見到佢喺銅鑼灣撞車，好彩冇人受傷。李小姐當時突然聽到嘭一聲，見到一架由高士威道左轉緊入銅鑼灣道嘅單層城巴停低咗，而一架私家車喺巴士右邊駛前去銅鑼灣道停車，落車嘅司機係林其欣。
李小姐話當時巴士轉緊彎，可能私家車以為過得切，喺巴士右邊攝過去，點知就發生碰撞。佢話嗰條路如果有巴士轉緊彎，基本上係冇可能兩架車一齊轉彎嘅。之後警察到場調查，其間紮馬尾、戴黑超、着外套短裙嘅林其欣用手機影低兩架車嘅損毀情況。
警方表示，53歲姓林私家車女司機及28歲姓周車長同意和解。翻查資料，林其欣早兩個幾月前，喺銅鑼灣蘭芳道撞倒一個清潔工嘅手推垃圾車，慶幸嗰次亦都冇人受傷。