比錫達斯禮拜四晚喺歐霸盃I組次輪分組賽，作客瑞典以0:2不敵馬模，德國門將卡利奧斯又派膠成為輸波罪人。當時係下半場八分鐘，馬模一次右路傳中，省中比軍左閘艾堅後稍稍改變咗方向，理應喺前柱位置睇準皮球來勢嘅卡利奧斯，唔知係咪錯誤判斷，跳起時間竟然出錯，只能睇住皮球直接飛入遠柱網窩，馬模之後再靠羅辛貝治射入12碼拉開比數。
至於L組方面，英超嘅車路士前鋒艾華路莫拉達終於打破入球荒，不過唔好以為呢位西班牙國腳有波入就好叻，事關佢喺上半場16分鐘，就近門射飛機，睇到場邊嘅基奧特眼都凸埋，好彩莫拉達總算生性，喺70分鐘接應韋利安頭槌射入，以1:0險勝到訪嘅維迪奧頓，暫以兩戰全勝得六分排榜首。