噚日中西區區議會財務委員會開會，民主黨立會議員兼中西區區議員許智峯為阻止撥款通過，擬將區議會副主席、民建聯陳學鋒推跌，許智峯話因為陳學鋒出腳被kick跌，陳學鋒則話對方被電話叉電線kick低，仲話考慮報警處理喎。
話說今日中西區區議會財務委員會會議原定審議多個撥款，包括由中區街坊福利會申請，涉15萬元嘅一個導賞項目。許智峯話因為財委會主席李志恒嘅外甥女衛珮璇係福利會成員，而衛曾於2011年區議會選舉代表該會參選，覺得有利益衝突，唔應該批出撥款；但許被主席禁止發言，於是離坐向主席抗議，點知去到陳學鋒個位時突然跌低，仲同陳學鋒一齊倒地。
根據陳學鋒提供嘅片段，許當時係企圖越過陳走向主席位置，而陳當時係用緊電話，許用身體靠向陳時疑失重心仆低，連帶陳亦一齊倒地。但短片影唔到兩人下半身，無法還原真相，大家自行睇片做評估。最終撥款都係成功通過。許智峯接受八方查詢時解釋，自己唔係有意撞跌陳學鋒，反而指控陳出腳將佢kick跌。至於陳學鋒就話當時自己用緊電話叉電，許係kick到電線而跌低，佢又話會考慮報警備案。