英冠球會阿士東維拉宣佈，正式辭退領隊布魯士。阿士東維拉今季戰績麻麻，領隊布魯士成為眾矢之的，上個禮拜二主場俾普雷斯頓逼和3:3後，布魯士更喺比賽中俾球迷掟椰菜。今年57歲嘅布魯士，2016年接替迪馬堤奧，擔任剛從英超降班嘅維拉主帥，上季帶領球隊殺入升班附加賽，可惜最終決賽輸畀富咸同英超擦身而過。維拉喺請到新領隊前，暫時會由U23領隊基雲麥當奴領軍。