紀律部隊人員揸車趕住執行職務，爭分奪秒保護巿民嘅性命財產係好緊要，但都要睇清楚路面情況先得㗎，如果其他駕駛人士冇番咁上下經驗同敏捷嘅身手，好易出事。
司機鬧爆揸車警
前晚8點左右，一部警車沿大圍富健街慢線向仁安醫院方向行車，去到隆亨邨對出打死火燈，想切線去快線再掉頭，啱啱快線有部七人車駛到，警車差啲就撞到七人車，好彩七人車司機反應快及時避開，先冇發生意外。陳小姐當時都係揸車向同一方向行駛，佢提供嘅車cam片，見到七人車司機駛前少少之後打死火燈停車，落車行去警車大鬧揸車個警察。
陳小姐絞低車窗，聽到七人車司機鬧揸車個警察：「你點揸車㗎？你點可以咁樣揸車？」仲話一家大細喺七人車上面㗎。陳小姐睇到七人車上面真係有大有細，而警車就有兩個警察，揸車嗰個警察首先落車，佢俾七人車司機鬧都好似表現得有啲理虧，初時冇出聲，隔咗一陣先話自己係安全情況下轉出。陳小姐聽到個警察咁講都呆咗，覺得直情係擘大眼講大話。
陳小姐話佢初時都以為警車打死火燈只係停車，估唔到係cut線U-turn，佢見到咁嘅情況都「嘩」咗一聲，覺得揸車嗰位警察咁樣做好唔啱，未睇清楚就切線想掉頭，有危險駕駛嘅嫌疑。佢想還一個公道畀七人車司機，所以公開車cam片。
就呢件事，警方發言人話喺前晚8點04分收到一宗999報案中心求助個案，警員去咗現場處理。警方會進一步了解事件，如有需要會跟進。警方強調，警務人員揸車執行職務嘅時候，喺任何情況下都應該以道路安全為首要考慮。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。