立法會九龍西補選提名期一開始，唔等劉小麗參選資格結果、提早報名嘅前民協馮檢基，一直話俾人抹黑，噚日佢直情喺facebook出post，話佢已係補選「候選人」，受《選舉及舞弊條例》規管，呼籲網民幫幫手，「若有網台，傳媒評論員言論，有失實聲明、抹黑、造謠，企圖扭曲狀況，影響選舉」，就記得私訊通知佢，話要建立民主文化！反對文革批鬥式選舉行為喎！仲講明「如有證據，報警處理！」
「講事實就得」
不過，係咪真係成為「候選人」就唔鬧得？八方就此問過資深大律師兼公民黨主席梁家傑，傑哥話選舉嘅嘢，兩陣對壘，互相攻擊、責難梗有㗎啦，只要係「講事實就得」，傑哥仲舉出當年唐英年與梁振英喺特首選舉爭凳仔例子，唐當時大爆梁03年倡以防暴隊和催淚彈對付示威者，「梁振英有冇郁（控告）佢（唐）吖？冇吖嘛！真係講過吖嘛！」
傑哥仲話空口講白話梗係唔得，但喺邏輯辯證之下，「有推（論）支持你，就冇問題」，假如有人批評阿基「收錢」參選呢？傑哥同意「有啲嘢唔應該講」，「唔係選舉（條例）都可能構成誹謗」，但強調「絕對唔係樣樣嘢都唔講得」，傑哥仲批評阿基公開收集抹黑材料，係「學埋老共啲嘢，搞白色恐怖，要人人自危個個噤聲！」 傑哥呢個評論都係根據事實作出，怕且阿基唔會去報警。
李八方