夏日為大地帶嚟美腿……吓，秋天到喇喎，唔理啦，新民黨主席葉劉淑儀繼續為大地帶嚟美腿！有網民唔知係咪唔抵得，寸葉劉年紀大仲着短褲？唔好睇小葉太，佢唔止捍衞自己嘅髮型，連着短褲嘅權利都捍衞到。
立法會就快復會，身為廿四孝媽媽嘅葉劉，一聽到囡囡邀請佢去旅行，二話不說立即起行。佢喺fb分享參與大自然徑導賞遊嘅見聞，好似睇吓薑花、黃金竹、柚木等。
但最搶鏡嘅唔係啲花花草草，係肉！係葉劉一雙又白又滑、唔算長但比例均勻嘅腿。可恨有網民睇完唔感恩，仲要寸葉劉幾多歲呀，學人着短褲。葉劉人在海外都要忙於回應話：「不要歧視年長人士。長者人權要（應該係想講『與』）年輕人無異！」有網民就好細心，問葉劉怕唔怕俾蚊叮親對玉腿，葉劉梗係醒啦，噴定蚊怕水㗎嘞！