唔少港人都鍾意睇戲，但睇戲睇到主角走嚟同你selfie，就唔係人人都有呢種禮遇！
話說前財爺曾俊華前晚同老婆帶埋囡囡曾文心，以及競選時軍師羅永聰去九展睇老友周潤發同郭富城主演嘅港產片《無雙》，鍾意影相嘅發哥再次施展selfie絕技，拉埋城城同薯片叔叔齊齊selfie，成功「野生捕獲」曾氏一家。
大讚優秀「誠意推介」
薯片叔叔都好識做，喺自己fb貼張相之餘，仲留言大讚睇咗一套「非常優秀的港產片，編導演都是國際級水準，誠意推介」，更留埋《無雙》同導演莊文強嘅hashtag幫手宣傳，唔使一晚就有超過3,000人畀like。其實薯片叔叔同發哥一向交情好好，當年佢選特首時就喺九龍城公和荳品廠「巧遇」發哥，大家笑住食豆腐花之餘，發哥仲大讚佢「好打得」，作為市民認為薯片叔叔係「好好嘅選擇」。