央視記者孔琳琳早前大鬧英國保守黨年會嘅香港事務座談會，更加因為掌摑義工被捕，引發外交風波。稱職地「歌頌祖國偉大」嘅外交部駐港特派員公署fb其後就出post為孔琳琳護短，形容「央視記者正常履職」，仲話佢係被「無指控釋放」，隨即引嚟網民反駁：「打人都叫正常履行職務？」結果仲同「小編」爆發罵戰。
互指漢奸 火藥味濃
孔琳琳疑打人一事連日不斷升溫，估唔到特派員公署fb亦加入戰團，該fb轉載咗《澎湃新聞》有關報道，話「央視記者正常履職被英國警方帶走，在中國駐英使館嚴正交涉後被無指控釋放」，惹來網民留言批評，有人問「打人都叫正常履行職務？難道是國家派過去打人？那她真的是完成國家任務了」，一向甚少回應網民嘅專頁「小編」，竟然留言反駁「她是記者，提問是她的工作」，「小編」留言之後再有唔少網民發表意見，留言一下子變得非常熱烈。
有網民再問，「示威是不是她的工作？打人是不是她的工作？」專頁「小編」隨即再次回應，話「如果她真的打了人，她就不會被無指控釋放」，當有留言提到「中華人民共和國外交部駐香港特別行政區特派員公署你是漢奸嗎？我国強大了，打了人也得放人！這是習大大的威風！」時，專頁嘅「小編」反問：「不知道說的就是你這樣的人嗎？」，真係火花四起，但邊個無理被K.O.？相信大家心中有數。
識睇睇留言
Kiki Lee：有怎樣的國家就有怎樣的國民，好正常呀！
Go Hiromi：全球排華行動已經漸漸進入高峯期，買定花生睇好戲啦！
Lancy Leung：打咗人仲叫人向你道歉，真的很難明，太深了！
Sai Being：強國人永遠都係咁，打人就話人家應該俾佢打，打輸就話人哋欺負佢。
資料來源：《蘋果》網頁
李八方