在陸羽與餐廳R拜拜之後，走去另一張枱與兩位骨科名醫傾偈，本想問吓注射幹細胞治膝頭呢個方法得唔得，點知手掌有微痛，中指好似脹脹地，於是乘機抽水，問名醫C：「我隻右手係乜嘢事呢？」名醫C睇完之後話：「你用右手過多啦，好可能係手指筋發炎，可以先擦藥膏，唔得就吃埋消炎藥。你寫稿，打手機短訊都用右手，太耐會出事都唔奇。」傾傾吓都唔記得問幹細胞之事咯，因為名醫C話德成大廈租客陸續搬走，明年二月底清場，佢搵地方不易，諗住搵唔到就退休唔再行醫，好彩最後在萬邦行搵到地方，九月尾就搬醫務所，名醫C嘆話：「香港乜都缺，中環難搵寫字樓，山竹吹爛我屋企一隻窗，還要等兩個禮拜先至有工人肯嚟修理。」
咪係囉，香港窮得只剩下財政儲備，不缺錢，其他土地缺，寫字樓缺，公屋缺，私樓缺，呢次山竹一吹，就暴露咗清潔工人缺，裝修維修工人奇缺，當然醫生缺，護士缺已經講咗好耐啦！
山竹吹冧林鄭民望，林鄭之市民支持度由九月初之正10%急降至打風後之負4.4%，山竹直情係香港之美國版Katrina（當年搞到小布殊總統焦頭破額），無情地揭露特區政府對颱風過後之處理工作，嚴重失陷。鬼唔係咩，9月16打風，9月17全港交通塞車，市民鬧爆，西隧口去尖山隧道修路因樹木阻路，嚴重塞車至9月20日。9月24日又因樹枝阻塞渠道，近南昌站一段水浸，交通警察都冇晒符，啲大高官去咗邊？哦，日夜趕工保證9月23日高鐵啟行，所有交通高官與林鄭特首都唔得閒理會民間疾苦啦。為咗高鐵，林鄭要推遲到高鐵開車之後先至肯撥時間到西貢，視察災情，慢咁多拍，民望唔急跌先至奇。高鐵開車不出亂子因為係國家級政治工程，民間疾苦係本地事啫，今日特區政府之優次幾時都係北京行先。
左丁山在9月16日為咗窗門滲水，苦咗好耐，慶幸屋企無損壞，還得神落。住在對面半山之證券A就慘咯，大風吹爛鐵閘，鐵閘撞爛鐵窗，客廳變成水塘咁滯，最弊事後搵工人執拾殘局，冇人睬，全部預約兩三個星期後。惡佬明返到地盤，正為滿場垃圾善後發愁，竟然收到區議員電話：「喂，你地有工人有車，盡社會責任幫居民清理學校垃圾啦。」自己未搞掂，要出街幫人？區議員識得唔搵食環署路政署，而去打私人地盤心口，幾醒目。惡佬明最後怕咗區議員他日找麻煩，派幾個工人出去做義工。