近排秋意漸濃，天氣都開始乾燥，一唔小心隨時發生火災。新田一個露天停車場噚日有一架旅遊巴起火，火勢迅速蔓延，波及泊喺隔籬嘅兩部旅遊巴，黑煙直捲半空。消防員到場開喉將火救熄，但三架車已經燒剩支架，好彩意外中無人受傷。
噚日下晝近兩點，有目擊者話，新田古洞路同青山公路交界嘅文天祥公園對開，有一架停泊喺露天停車場嘅旅遊巴突然着火，隔籬兩架並排嘅旅遊巴亦被波及，遭火舌吞噬，瞬間變成火燒連環車。現場有司機話：「離好遠都望到好大煙，好多爆炸聲，燒到啪啪聲」，大量濃煙捲上半空，半公里外都睇得到。
消防接報出動兩條喉同派出兩隊煙帽隊趕到灌救，大約半個鐘後將火救熄，幸好未有傷亡報告。三架旅遊巴都燒剩支架，全車熏黑，連附近嘅草地都燒燶埋，警方正調查意外原因。