美酒佳餚巡禮今年踏入十周年，旅發局斥資4,100萬大搞「十」主題，本月25至28日係中環海濱及添馬公園舉行。旅發局節目及旅遊產品拓展總經理洪忠興話，有7米高巨型蛋糕嘅「打卡位」，當蛋糕轉動及響起音樂時，「Super Time」有獎遊戲就會開始，入場者只要掃描場內QR Code參加AR遊戲就有機會贏得國泰航空雙人香港往返華盛頓商務客位機票、波爾多酒莊兩晚住宿及當地旅遊套餐等獎品，預計有14萬人次入場。
800蚊紀念品酒證附送
今年特設「Perfect 10」紀念品酒證，每張800蚊，包20張品酒券同10張美食券，仲送第十屆限量版Lucaris酒杯，酒杯獨有金色杯腳設計，底部五條標誌性嘅弧形線條，有助促進微氧化同軟化酒質；標準品酒證就同上年一樣每張200蚊，品酒證由今日起發售；鍾意美食嘅你可以品嚐米芝蓮星級晚宴同萬聖節下午茶。
八方收到風，「咖啡王子」陳豪會擺檔介紹咖啡，而近期熱爆《全民造星》姜濤仲會出現，粉絲們就唔好錯過啦！