葡萄牙球星基斯坦奴朗拿度（C朗）俾人指控喺09年涉嫌強姦，拉斯維加斯警方已經重新對此案進行調查。
據報道，今季轉投祖雲達斯嘅C朗俾現年34歲嘅Kathryn Mayorga指控，09年俾當時啱啱加盟皇家馬德里嘅C朗喺一酒店套房強姦。根據Kathryn Mayorga上周五入稟法院嘅文件，C朗當時邀請佢到自己喺酒店頂樓嘅豪華套房欣賞拉斯維加斯嘅美景，當佢喺浴室換衫時，C朗行入浴室要求佢幫自己口交，然後將佢拉上床繼續施襲。拉斯維加斯警方周一表示，受害人當時並冇提供事發地點或對嫌疑人嘅描述，警方已就此案重啟調查，探員會跟進以取得相關訊息，但目前冇進一步資料可以透露。
C朗就強烈否認有關指控，並喺ig指係假新聞，佢嘅女朋友佐真娜（圖）都力撐，喺ig發文支持C朗。不過C朗唔知係唔係因為呢啲是非，加上佢係歐聯對年青人一仗要停賽，日前嘅祖記操練，就唔見C朗出席喇。
