特首林鄭月娥之前已「出口術」表明填海無可避免，前特首董建華任主席嘅團結香港基金會一向力sell填海造地方案，今次佢哋仲搵到有「民間特首」之稱嘅影星劉德華聲演，力sell基金會倡議嘅東大嶼都會填海方案。
條片叫《讓下一代看見》，片長約三分半鐘，提到香港現時面對嘅困局，如「上不到車、租不起樓、上班擠迫、放假更擠迫」，劉華就話覺得東大嶼嘅人工島方案睇落係比較可取，又話雖然可能有排搞，但唔應該因為時間問題而猶豫，只要值得做就應該馬上做。對於外界對填海就有好多唔同意見，劉華係片入面為政府解畫，話世界點會有百分百完美嘅方案？想香港繼續向前行，取捨在所難免。好多人都想知道，點解劉華肯幫團結香港基金？劉華透過公司發言人回應話，一直以嚟覺得香港土地不足，偶然機會下知道團結香港基金嘅「東大嶼大規模人工島方案」建議，經了解後覺得係積極可取嘅方案，所以義務擔任影片嘅旁白喎。