曼聯隊內嘅負面新聞真係日日新鮮日日甘，領隊摩連奴周一出席歐聯賽前記者會嗰陣，就已經講到明隊內某啲球員唔關心球隊，輸咗波都唔似輸波，言談間似乎就暗寸緊同佢唔妥嘅保羅普巴。另一邊廂就有英媒爆料，話如果唔炒摩佬嘅話，普巴就決定喺一月轉會窗走人。
魔兵衝刺跑遠落後紅軍
摩連奴周一喺記者會就表示，佢睇得出球員嘅行為同反應，係咪真心為球隊出力，「我睇到有啲球員輸波真係會唔開心，但有啲人睇落就唔多似輸咗，好明顯某啲球員比其他人較關心球隊勝負。」雖然句句有骨，但摩佬講嘅嘢又真係有數據支持。話說有統計發現，上周六曼聯對韋斯咸場英超，所有球員喺90分鐘內速度達到時速25.2公里嘅衝刺跑，全隊加埋都只有59次，比起第一名嘅利物浦154次，少咗差唔多100次，又真係好hea咁喎。
不過調番轉咁睇，亦可能係球員已經唔想再為摩連奴賣命。利物浦名宿加歷查喺周一天空體育嘅節目就指，摩連奴已經控制唔到更衣室，「呢種矛盾已經第三次發生，首先係皇馬，然後係車路士，𠵱家就係以普巴為首。」加歷查仲表示，如果曼聯頹勢持續落去，摩佬隨時喺嚟緊國際賽期就被炒，而近日意大利傳媒就報道，前車路士領隊干地同埋即將離開祖雲達斯嘅CEO馬路達，將會取代摩佬同埋現時紅魔CEO活華特嘅位置，至於係真係假就不得而知。
巴塞高層斟普巴有分歧
另外，如果球會管理層唔想炒摩佬，咁就可能要面臨失去普巴。近嚟摩佬同普巴嘅牙齒印多不勝數，先係褫奪咗普巴嘅副隊長位置，再嚟就係有傳媒影到兩人喺訓練場口角。根據報道，呢位25歲嘅法國球星早已同隊友放風，如果摩佬唔走，自己就會喺一月轉會窗求去。之但係，盛傳有意羅致普巴嘅巴塞隆拿，就傳出高層就買入普巴存在分歧，唔知仲有咩球會有興趣呢？