餐廳R每年暑假去意大利行山兼考察意大利菜及餐飲，但今年去得幾耐吓，久未在陸羽出現。呢日卒之亮相嘞，但要拎住枴杖上樓梯，行路姿態總算唔錯，記得在暑假前佢唔使用枴杖嘅噃，呢次有乜原因？原來佢身高六呎四吋起碼，體重二百多磅，年輕時又愛打籃球，與南華會元老盧潤森同是甲二組南華隊球員，到了今天年紀大，膝頭有事嘞，一般美國人會入院做Knee Replacement手術，不少NBA球員退休後視之為家常便飯，但餐廳R來港40餘年，行為香港化，唔願做，點好呢？
咪去意大利搵專科醫生囉。佢聽聞歐洲已有新方法治療膝頭軟骨退化，就係打幹細胞入膝頭蓋，話可以刺激退化軟骨重生喎！於是餐廳R趁去意大利之便，搵醫生注射幹細胞入膝頭，故此今次逗留意大利實際時間比往年長咗，返到嚟暫時用枴杖扶助雙腳行路先。這個方法如果得嘅話，香港一定有大把人走去歐洲注射幹細胞啫！
中大校長段崇智教授係骨科組織專家，五月中大校友創業博覽日，校長就講述咗幹細胞軟骨技術，好似係已經進入臨床實驗階段，幾年後有機會出台。意大利方法與段校長技術，因左丁山係門外漢，不知有何異同，但既是餐廳R老友，自然會密切留意佢嘅膝頭以後是否恢復正常。
星島集團CEO蕭世和師弟日前在專欄講起會德豐／九龍倉集團吳光正先生已年逾七十，仲係鍾意打籃球，其實打籃球係吳先生數十年嗜好，與奧巴馬雷同，一有機會就打嘅嘞！餐廳R效力南華時，因在銀行工作，船王包玉剛嘅環球船務係大客仔，吳駙馬約銀行打波，在美國國際學校舉行，銀行總經理吩咐餐廳R等人要禮讓少少，唔好撞親吳先生，點知吳先生好鬼competitive，勇於求勝兼且身高手長，不斷上籃強爆，餐廳R唯有同佢鬥撞，友誼賽變成爭勝賽，銀行最後輸咗，餐廳R事後同我哋講Peter Wu鬥心強勇於競爭，他日執掌大權必然擴充業務，大有前途。眨吓眼幾十年，果然係返銀行，有人工冇發達，吳光正早已優哉悠哉，而餐廳R仍然捱世界，繼續為大業主打工！餐廳R話佢有間新餐廳開幕，叫做Belgos，位於利園山利園三期地下，set lunch收$180，叫我哋去幫襯。去銅鑼灣就少啲機會咯，但聽到高盛租咗利園三期幾層樓，11月入伙，希望到時多啲ibankers光顧吓啦！