【體育人訪】他不是天生明星相，維基百科只用了四行字介紹他，兩年前炒車令他鼻子變歪，人稱「肥高」的高肇蔚，自言「冇天份」、「好平凡」，等了八年才拿到第一個冠軍、八月的亞運銀牌等足12年，人人笑他儍，他理直氣壯的說：「人哋選擇逃避時，我勇敢面對失敗，做到得為止，咁叫儍的話，我想一直儍落去。」
記者：徐嘉華
攝影：王子俊
肥高金句：「細個好鍾意食、好鍾意嘆冷氣，唔喜歡運動，只會坐喺屋企嘆冷氣，肥到冇可能做一個運動員。」
香港單車歷來人才濟濟，成績彪炳的有世界冠軍黃金寶、郭灝霆、李慧詩、世青冠軍梁峻榮，精神可嘉的有亞運「鐵血女戰士」黃蘊瑤、曾做過職業車手的張敬樂，怎數也數不到高肇蔚，他拿過的金牌不用五隻手指也數完，上星期多添一面，在印度亞洲盃奪個人追逐賽金牌；不說不知，原來他與「牛下女車神」李慧詩是同期入訓練班，只是各有各的際遇。
「肥高」這個暱稱自小跟着他，看過他小時的照片就知原因，他說：「細個好鍾意食、好鍾意嘆冷氣，唔喜歡運動，只會坐喺屋企嘆冷氣，肥到冇可能做一個運動員，小學每次學校體檢，我一定被營養師捉入房訓話，叫我控制飲食。」
肥高金句：「如果唔係中三入咗單車青少年計劃，我估我一定會變成一個『死飛仔』。」
訪問約在車友一定騎過的城門河「孖橋」，不少人調高喇叭聲浪騎單車，肥高也試過這種歲月，自小就不喜愛讀書、中一開始與一班小混混、每天晚上扭盡單車上的喇叭騎通宵，他自己也說：「回想當時，金毛頭髮、又唔鍾意返學，係個邊青，我嗰間中學已經係沙田區band 5最差嘅學校，我連中四都升唔上，可以想像我幾差，如果唔係中三入咗單車青少年計劃，我估我一定會變成一個『死飛仔』。」
問肥高，現在見到如他當年一樣的街車友，會否捉他們入隊，他笑着說：「我會叫佢哋試試追唔追到我先，追到嘅就同佢哋傾傾。」別以為肥高中一天天騎通宵，運動一定好厲害，他記得中二那年，學校強逼學生參加陸運會，一直沒運動的他選最短的男子100米跑，他邊回憶也邊笑自己，未到終點已見到衝線後的人慢慢走回終點，他用了16秒2才完成，他說：「呢個時間我都跑得出，真係完全冇天份，冇可能做到運動員。」
就算中三時，有老師幫他報名參加單車「明日之星」甄選計劃，全部體能測試包括立定跳高、掌上壓、跑3,000米等大部份不及格，只有踏一條兩公里斜坡的梅子林得第一名，「明日之星」分三階段，從第一階段的2、30人，逐階段篩走不及格的，到最後入到青訓，每年只得五、六個，但就給肥高頂過去，同期還有「女車神」李慧詩。
肥高金句：「我用咗八年先喺2014年攞到大馬公路賽嘅分站冠軍，呢個係我第一個冠軍。」
單車，是中四也讀不上，要去讀IVE的肥高一條出路，雖然佈滿荊棘，令他渾身受傷，他都心甘情願，並謙稱：「我真係一個冇天份又普通嘅運動員，剛入單車隊時，連公路單車多日賽都踩唔完，由2006年全職，我用咗八年先喺2014年攞到大馬公路賽嘅分站冠軍，呢個係我第一個冠軍，你問我有冇怨過，我冇怨，但有唔開心、有沮喪。」近八年，肥高試過兩次退隊，一次是2013年減人工，一次是2016年在昆明訓練途中炒車，動過三次手術，鼻子也撞歪了，連高媽媽也哭着叫他停下來。
肥高金句：「嗰時感覺我去洗碗還比喺體院人工仲高……我真係冇踩車兩、三個星期，不斷搵親戚朋友食飯，但好快就覺得好唔開心，好頹廢，好想返去單車場踩車。」
肥高19歲做全職運動員，好不容易捱到體院「精英A」約二萬多元月薪，但2010年廣州亞運做完大後備，像做了場夢後，一直交不到「精英A」的成績，薪酬連跌兩級，減了一半以上，他說：「嗰時感覺我去洗碗還比喺體院人工仲高，亦諗過去考消防，沈教練（港隊總教練沈金康）叫我返香港冷靜一下，我真係冇踩車兩、三個星期，不斷搵親戚朋友食飯，但好快就覺得好唔開心，好頹廢，好想返去單車場踩車。」多得2013年的堅持，肥高在2014年首嘗大馬分站賽冠軍。
肥高金句：「點知炒車咩都冇晒……醫院都住咗個幾月，整個人都好灰，唔知自己係咪能踩回之前嘅水平，打定輸數要退。」
單車人時常將「炒車係家常便飯」掛嘴邊，但2016年肥高在昆明訓練時那次炒車，一點也不家常，他在高速下撞到前方車手的尾輪，撞傷頭部及鼻子，原本翌日要去環韓多日賽也告吹，在昆明及香港做了三次手術，男生鼻子歪了事小，但原本高昂的意志被打沉事大，他說：「炒車前我嘅狀態好好，想喺環韓多日賽有一番作為，點知炒車咩都冇晒，嗰年遇上港隊忙着備戰里約奧運，得我一個人喺香港養傷，醫院都住咗個幾月，整個人都好灰，唔知自己係咪能踩回之前嘅水平，打定輸數要退；好記得我初癒時，沿住沙田單車徑踩入大尾篤，我連一圈新娘潭都踩唔完。」
肥高金句：「我當時只知我好想重回單車舞台，我同媽媽講：『你畀我去踩喇，我真係好想踩，每日練完車都會向你報平安。』」
高媽媽也哭着叫兒子不要再騎單車，擔心再出意外，身為家中么兒的肥高也感內疚，他說：「我當時只知我好想重回單車舞台，我同媽媽講：『你畀我去踩喇，我真係好想踩，每日練完車都會向你報平安，比完賽我會第一時間同你講我比完賽喇，我平安無事呀。』佢先畀我繼續踩落去。」皇天不負有心人，肥高再次堅持，2017年天津全運會夥拍梁峻榮奪麥迪遜銀牌，今年雅加達亞運團體追逐賽，他與梁嘉儒、梁峻榮、繆正賢及張敬樂奪得銀牌，都是肥高應得的，他們更在資格賽以4分09秒820刷新香港紀錄。
肥高金句：「就算仍有人話我儍，我都想繼續儍落去，我只知𠵱家唔想停。」
問下月將滿31歲的肥高，手上這面亞運銀牌來得遲嗎？他說：「我唔介意獎牌來得遲，有冇獎都好講運氣，有人覺得我好儍，這些年冇成績仲繼續踩，我係失敗過好多次、受挫過好多次，但我冇逃避，雖然我獎牌唔多，但喺單車，我有賺冇蝕，𠵱家每日都好有目標去做鍾意做嘅事，每日瞓醒都想踩得比噚日快。如果唔係單車，我可能係個侍應、跟車工人、或者做地盤。」
肥高懶理別人笑自己儍，這些年的歷練及努力，令天份不高的他一步步成為精英運動員，他說：「就算仍有人話我儍，我都想繼續儍落去，我只知𠵱家唔想停。」
