風水真係輪流轉。幾年前之嘛，做緊食物及衞生局局長嘅高永文帶埋佢位政助陳凱欣去立法會，通常都係高永文行前、陳凱欣行後，高永文接受訪問，陳凱欣就企喺旁邊睇。不過噚日佢兩個嘅角色啱啱相反，梗係啦，陳凱欣要升呢博做議員吖嘛。
坦言「一齊做嘢唔易」
係呀，幫九龍社團聯會做咗一個月左右「健康大使」咁大把嘅陳凱欣，正式宣佈參選九西補選啦，真係一啲意外同驚喜都冇。八方去咗現場，即係九龍城亞皆老街足球場睇，大大個足球場，但係人唔算多，記者嘅數目拍得住陳凱欣嗰邊嘅人。陳凱欣參選喎，建制派做乜唔捧場呀？得高永文同埋民建聯鄭泳舜咋？阿欣話呀，噚日係分享會，想搵番啲朋友出嚟，展示一下真誠箒。咁唔怪得之幾個建制大黨，都冇啲話得事嘅人現身啦。
現場最「星」嘅就得番民望高。話就話係星，但民望高相當識做，大家都放低局長同政助身份，民望高處處以阿欣為先。好似阿欣受訪嘅時候，民望高立即埋位做番佈景板，仲要幫唔夠手長嘅記者遞咪，擦靚阿欣嘅形象。不過民望高致辭時就話，實情「同佢（阿欣）一齊做嘢都唔係咁易」，仲自爆佢哋有過激烈辯論，因為阿欣個人好有正義感，唔理你係邊個，總之啱嘅嘢就支持，所以有時都好唔客氣。哇，呢招明鬧暗撐都算用得刁鑽。