高肇蔚當初加入香港隊，只有一個很簡單的原因：「就係同黃金寶做隊友」，不知是否受這位大師兄影響，肥高坦言鍾情公路單車多於場地單車。
「細個未熟悉單車時，你唔會知有咩獎去攞，嗰時純粹鍾意踩單車，亦時常見到有阿寶攞獎新聞，所以覺得能同阿寶一齊踩單就好開心。」肥高沒想到與阿寶做隊友後，阿寶退役加入成為香港單車隊教練，亦是肥高的半個教練，而他2014年在大馬分站奪得冠軍那一次突破，原來跟阿寶也有關係。
肥高稱：「嗰次大馬多日公路賽攞分站冠軍，我係喺第四站攞嘅，其實頭三日我都踩得唔好，試過突圍，但都唔成功，當時已經係教練嘅阿寶，見我哋似無心戀戰，佢每晚都同我哋講，每日係重新開始嘅一日，嗰次佢特別想我攞分站冠軍，佢同我講最深刻一句：『你試試將呢場比賽當成你人生最後一場比賽，你就會放開自己去踩』，最後成功咗，如果唔係阿寶一直push我，我未必攞到呢個分站冠軍。」
事實上，肥高鍾情公路單車賽多於場地單車，他希望未來有更多公路單車賽上場機會，他說：「我好享受如公路單車嘅多日賽，每日都有比賽，每日都可以同外國車手交流競爭。」
跟肥高同期出道的，除「女車神」李慧詩仍氣勢凌厲外，小肥高幾個月的郭灝霆因傷被迫提早退下來，大肥高一、兩年的黃蘊瑤及張敬煒都已退役，後者轉任香港單車隊教練；問肥高下一個目標，他坦言是2020東京奧運的公路賽，他說：「去奧運邊個唔想，但有時候唔係想去就去到，去奧運公路賽嘅席位唔易攞，或者協助隊友爭取奧運公路賽席位已經足夠。」
記者﹕徐嘉華