黃金周來犯，喔不，一時口快，將強國貴客當成山竹二世，失敬。既然黃金周來了，高鐵客量一定有升冇跌。西九商場圓方，高鐵開通首日，以豪華聞名的商場廁所忽然擠爆，絡繹於途的過客熱烈捧場，清潔阿嬸做到冇停手，幸好沒發生翻版紅館事件。高鐵貴客，雖然冇可能多過子華神鐵粉，但萬一貴客唔乖，去商場廁所「散水」，甚至不理勸喻蹲下，來一記超越道德底線的「瑞典模式」，阿嬸好難做，抱怨兩句，隨時工都冇埋。山竹難啃，黃金周一地都係更惡頂，天佑阿嬸。
高鐵客量不達標，高層篤極埋唔到盤數，南下那條復興號列車偏偏就在此時駛入八號月台，其中一隻車門緊貼月台，因此開唔到！高層解話，八號月台暫時唔招呼復興號，又說32隻車門中只得一隻芝麻唔開，小菜一碟。搬龍門，毫無疑問，係2.0政權新常態。高鐵車門，搬！沙中線沉降？搬！由後備補上正選位置的林鄭，真的唔知波係圓嘅？沾沾自喜以為搬走豆腐渣龍門就能單刀的奶媽，幾時會被茂波頂爆抬離場？