求驗客手記：
尹佩斯瘋狂四分鐘入波領紅 - 求驗客

飛燕諾喺周日嘅荷甲憑尹佩斯射入靚罰球，主場以2:1反勝維迪斯，但該名前曼聯及阿仙奴球星卻喺入波後四分鐘飛鏟對手領紅被逐，幸而飛燕諾仍能擊敗最後僅餘九人應戰嘅維迪斯。
維迪斯32分鐘由比路先拔頭籌，半場領先飛燕諾1:0。飛燕諾喺47分鐘由保達軒入波扳平，戰至63分鐘客軍有湯馬士賓斯領紅而少踢一人，飛燕諾則喺87分鐘離門30碼外獲得罰球，尹佩斯左腳妙射破網，主隊反先成2:1。不過，僅四分鐘後，35歲嘅尹佩斯就因為飛鏟麥斯奇勒而被球證以紅牌驅逐，維迪斯補時五分鐘亦再有杜基希領紅，最終飛燕諾贏波。