灣仔道59號地下一間藥房噚日下晝近2點俾人搗亂，兩名戴口罩嘅男人突然走到藥房門口，向門外貨品同舖內淋紅油，之後就向街市方向走咗去。不過兇徒唔好以為咁就甩到身，附近有車cam拍低晒佢哋犯案嘅經過，警方追緝緊佢哋歸案。
從讀者提供嘅車cam片睇到，兩個戴口罩嘅兇徒分別着白色衫同黑色衫，兩人手上各拎住一個裝咗紅油嘅藍色膠桶，分別向藥房門外嘅貨品同舖內淋紅油，其中黑衫嗰個兇徒淋完油之後，仲將成個膠桶掟埋入舖內，犯案過程只有6秒。
案發嗰時藥房門外都有市民經過，佢哋都嚇到急急腳避開。藥房門外嘅廁紙同埋清潔劑等貨品，統統染成紅色，行人路更加留低大灘紅油。藥房職員事後報警，警員之後到場調查，店員就話之前冇接過恐嚇，唔知點解俾人淋油咁大整蠱喎。現場有消息就話喎，個幾月前呢間藥房都曾經俾人搗亂，兇徒聲稱要人「找數」，但當時職員就冇報警囉。