看新聞報道，知道金管局會批出「虛擬銀行」牌照，有29間公司申請，金管局表示會在今年底或明年第一季發出牌照，第一批虛擬銀行牌照有8至10張，29間申請人之中，有中銀香港、渣打、康宏與歐洲匯商等等，又傳平保八達通搵咗柯清輝加盟申請牌照，香港電訊、騰訊一大堆亦有可能加入戰圈。
咁熱鬧，係好事定麻煩事？現在當然唔知，記得2000年科網狂潮之時，大新銀行開咗一間網上銀行，做做吓已在市面不見。將來虛擬銀行從事甚麼業務呀？想落亦不外乎商業信貸，存款付款，理財產品及買賣外匯一類，網上買賣證券，申請IPO，必然有喇啩？換言之，與今日之商業銀行網上服務相同，好似係新瓶舊酒啫噃，虛擬銀行究竟會帶來甚麼新潮風氣，古老人如左丁山一時之間諗唔到，都係一句老話：摸着石頭過河，成熟一項做一項，等金管局批准嘅啫，香港金管局素來管到銀行冇啖好食，合規成本高過鬼，香港斷唔會有內地P2P爆煲情況出現嘅。
如果虛擬銀行將來有十幾間嘅話，董事會及管理人才從那裏來？第一個方法係向實體銀行挖角一啲管理及業務、IT、Fintech人才，搶高人工，第二個方法係董事會成員向退休銀行家埋手，搵佢地做非執董，睇住檔攤，向金管局交代。唔怪得一啲大名機構據報搵鄭海泉、柯清輝等名人加入啦，不少退休賓架如梁高美懿、葉約德、羅志偉等等或會受邀重出江湖。
上星期午飯後在中環漫步，碰到賓架P，佢通知一聲：「明年一月裸退！」咁有決心？佢在65歲已退休一次，畀銀行挽留做高級顧問，眨吓眼，已經五年，佢話明年第一季在馬會會變成榮譽遴選會員（即是70歲），要知所進退，唔好做到鞠躬盡瘁咯。想落都係嘅，1973年佢自中文大學畢業加入銀行界以來，一份工做足45年，過程中見盡不少經濟行業興替，新舊富豪移位及內地新發財崛起，係時候退下來了。佢業餘又鍾意攝影、燒槍及博覽群書，明年一月後多啲時間追求個人愛好，值得吖。不過明年會唔會在中環搵番個竇，得閒就與左丁山食飯呢？又想起目前興起開設虛擬銀行之風，賓架P資歷好過90%賓架，他日退休後，係虛擬銀行非執董之最佳人選。左丁山即向佢提起，賓架P板起面孔：「你唔好咁多事！」好喇，唔講，但假如有獵頭界老友問起，講唔講好呀？