噚日嘅中共建政慶祝酒會，除咗689同唔少「梁粉」現身酒會，雨傘運動時曾向警員大喊「你哋無做錯到」、現時身兼全國政協委員的警務處前處長「禿鷹」曾偉雄，亦容光煥發咁現身，仲同嘉賓言笑甚歡。可惜由於佢一直遠離記者區，所以大家都唔知佢對於因為用警棍襲途人，噚日要喺獄中度過國慶的朱經緯，又有乜感受？
講起用棍，就不得不提噚日酒會上，突然喺西裝掹出一支伸縮「神棍」自拍嘅醫生李家仁。李家仁同八方講，自己好多時都會帶備兩支「神棍」喺手，以備不時之需。李家仁又話，佢日前更推出咗個 《小明搭高鐵》的新MV，片中見佢用咗唔少佢喺高鐵通車當日，用「神棍」同運動攝影機拍攝嘅新片，運房局前局長張炳良、大律師公會前主席譚允芝等人，都做咗佢佈景板。