周日意甲聯賽，AC米蘭終於做番場好戲，三連和之後重上勝軌，作客以4:1大勝薩斯索羅。呢場波最特別唔係米蘭入到四球，而係四個入球都係來自禁區外起腳，今季佢哋已經有五個入波都係嚟自禁區外，暫時係意甲最多。
加度素認防守須改善
AC米蘭今場喺39分鐘由基斯爾先開紀錄，半場領先主隊薩斯索羅1:0。換邊後五分鐘，紅黑兵團嘅西班牙翼鋒蘇索打破喺意甲嘅入球荒，射入個人自今年二月以嚟嘅首個意甲入球，協助AC米蘭領先至2:0，今場亦係佢第100次喺意甲上陣。森姆卡斯迪利祖喺60分鐘遠射得手，助球隊將比數改寫成3:0後，薩斯索羅喺68分鐘由菲臘杜歷錫追番一球。不過蘇索就喺補時階段主射罰球省中人牆後補射建功，協助AC米蘭以4:1擊敗薩斯索羅。值得一提嘅係，今次係AC米蘭自2004年有統計紀錄以嚟，首次喺一場比賽之中禁區外射入四球。
AC米蘭經歷三連和之後今季喺意甲第二度報捷，目前以6戰得9分升上聯賽榜第10位。由於薩斯索羅不敵AC米蘭，同日喺主場以2:0輕取阿特蘭大的費倫天拿憑較佳得失球升上第三位，同樣係7戰得13分嘅國際米蘭和薩斯索羅就分別排第四和第五位。
雖然AC米蘭終止咗不勝走勢，但失波問題依然嚴重，已經跨季連續12場聯賽未能保持清白之身，教練加度素賽後亦同意需要正視呢個問題：「球隊嘅防守並唔理想，呢個不單止係後防嘅問題，而係我哋中場嘅保護性不足，唔能夠將對手逼向邊線，而且球隊嘅防線墮得太後所致。」
蘇索起孖破入球荒
西班牙中場蘇索今場梅開二度，打破咗自今年二月開始嘅入球荒，加度素亦大讚佢同其他球員嘅表現：「我相信今場比賽可以增加我哋對自己工作嘅信心，蘇索一直嘅表現都好好，過往佢一直擔當鋪橋搭路嘅角色，所以好少走到中路爭取入波，但係佢嘅入球能力唔會比其他翼鋒同前鋒差，呢樣嘢佢平時喺練波嗰陣已經證明咗。」