政圈近日不時流傳，話身為全國政協副主席嘅梁振英想回魂，好想再出嚟選特首。係真係假冇人知，但傳到似層層，難免嚇親人，最近甚至有個傳聞震驚人心，傳到梁振英想坐國務院副總理韓正個位咁，八方聽到呢個傳聞當堂嚇一跳，然後得啖笑，覺得班梁粉為證明689仲有政治能量，真係乜都噏得出。
八方早前同某位建制中人傾開偈，話題不期然去到689想回魂呢宗花生熱話。呢位建制中人聽完就擰擰頭，示意唔係真嘅，講真吖，八方個心頓時真係定一定，點知佢繼而話：「你有冇聽過佢（梁振英）想坐韓正嗰位？」嘩，嚇死人咩，個心真係離一離。呀，唔係，係離十離先啱！
追問之下，該建制中人話喎，佢聽過挺梁嘅建制派講過，689心繫大灣區，好想親手孕育呢個寶貝，而區區一個特首，梗係唔夠宏觀，直頭要「入常」主管港澳事務，先至可以真正高層次搞好大灣區。冇錯，講緊進入中共中央政治局常委，即係現時包括習近平、李克強、栗戰書、汪洋、王滬寧、趙樂際及韓正嘅七常委。
64歲發力難成事
八方最初聽完真係笑咗出嚟，覺得咁傳法唔止創意無限，仲唔多唔少帶有喜感；但該建制中人好嚴肅咁叫八方，唔好只當笑話聽，指好多時梁營講咗啲似講笑嘅嘢，但最後都會成真㗎喎！不過稍為對中共有認識都知，要做政治局常委，首先要係共產黨員，乜689有認過佢係黨員咩？
而且要入到常，先要問問有冇「紅色」血統，就算如習近平咁係紅二代出身，由普通黨員幹部開始一級級向上爬，做到中央委員、再入政治局、最後爭到入政治局常委，前後用咗30幾年時間，今年成64歲嘅689今日先開始發力，當佢真係有機會，怕且佢要100歲唔死先有機會入常。
李八方