大編輯得知高錕教授去世消息後，感覺有啲突然，佢話三個星期前，還在沙田禾輋商場見到高太與菲傭陪住高教授曬太陽，態度安詳。禾輋商場三樓有一個平台，天氣好時，平台陽光猛照，老人家在此安坐，吸收維他命D，一樂事也。不少長者驗身之後，如家庭醫生夠細心，叫驗埋維他命D，往往發現長者缺乏或不足，要食維他命D丸，醫生話最好既吃丸，又不時曬太陽，唔係叫你好似澳洲人咁樣日光浴，而係揀個地方在陽光下曬番半個小時左右。缺乏維他命D，會導致骨質疏鬆，老人家比較容易跌親，一跌親就往往搞到斷骨（如手骨、腳骨、背脊骨），療治起碼幾個月，更嚴重嘅就係要入醫院，入咗去唔出番嚟嘅，在所多有，左丁山幾位朋友之爸爸媽媽，就是如此，不可不慎也。故此老人家多曬太陽，絕對需要。沙田禾輋商場三樓平台係曬太陽好地方，高太一早知道。高教授退任中大校長後，曾居於跑馬地，做過壹傳媒獨立非執董，及與黃匡源、馮慶彪醫生等創辦貝沙灣弘立書院，經常出入中環，左丁山就在電車路見過佢好多次孭住背囊追電車，左丁山對佢講：「校長，小心呀，唔好急。」高校長往往以標準笑容回應：「我還可應付得來。」
可惜有一次左丁山在跑馬地見到佢，如常叫校長，佢一面茫然之色，望住左丁山而無回應。哎吔，心知不妙，後來從與高校長來往甚密嘅俞靄敏師姐口中得知高校長移居矽谷山景城（Mountain View），正是老來從子。
高校長得諾貝爾獎後，世人皆知高校長染上腦退化症，人人感到遺憾。佢返回中大，接受歡迎，歡呼，校友感到光榮之餘，為高太及校長感到心酸，兩人居於山景城，無車不行，高太一定每日奔波，又無傭工幫忙，長此以往，不是辦法。高校長昔年隸屬聯合書院，左丁山大膽向聯合大哥何萬森提少少意見，森哥與高校長年紀差不多，感同身受，立即向聯合書院院長馮國培教授建議請高校長夫婦回港安居，聯合校董會大力支持，安排籌款，誠懇游說高太接受此建議。高太係明白人，考慮後就接受聯合書院盛情，回港定居中大，讓高校長可以接受中大醫療照顧，日常由菲傭及高太看護出遊，高校長可說安享晚年，亦充份顯示出中大聯合書院及聯合校友之人情味。高校長生前豈止對中大有功，當今世界冇光纖嘅話會是甚麼樣子？電台節目主持人小G每日一邊做節目，一邊上網，搜尋最新本地及世界新聞，每日都講一次「多謝高錕」呢！