許鞍華出席座談會，有人好問唔問，問起最近緋聞纏身的已婚內地藝人吳秀波，皆因二人曾經同（電視）台演出，有過近距離接觸，八卦精見機不可失，希望輕輕手陷人於不義。思路清晰的許導什麼場面沒有見過，懵盛盛落疊先至奇，氣定神閒答：「我覺得私生活同工作唔應該混埋一齊講。」言之當然成理，一般人朝九晚五打份牛工，只要做好份內職務，收工後打機又好打飛機又好，甚至打麻將打老婆，關普羅大眾屁事，道德L板起臉孔話藝人曝光率高，行差踏錯會教壞細路，真是多嚿魚──家陣的小朋友唔知幾醒，仇富和唔抵得人哋出鋒頭，請老老實實認咗佢。然而莫怪我大細超，更萬勿無中生有話我睇唔起戲子，投身某些行業，私生活不檢點卻的確不可原諒，總統、神父、警長、法官這些社會棟樑，職業本身內置領導成份，就必須一天廿四小時行得正坐得正，切忌偷偷摸摸叫雞狎童或者與勢力人士攬頭攬頸，食得鹹魚抵得渴，如果人生目標鎖定在黃賭毒，唔該乖乖從事無關宏旨的卑微工作，譬如車衣掃地寫稿教健身。
至於幾十年前的風流韻事被挖出來當黑材料，義務辯護律師們免不了振振有辭，一方面質問指控性侵強姦的受害人為何當日沒有挺身而出，一方面打哈哈以「後生仔邊個唔係咁」開脫，就像發育中的男性賀爾蒙領了免死金牌，校園隊酒隊草隊女生是天經地義的成人禮儀式，無傷大雅的更衣室笑話。人不輕狂枉少年固然是事實，但荒唐總不能離晒大譜吧，貪口爽或者基於其他自私理由將青春惡行合理化，因住行雷閃電啊吓。