「慢慢走，勿亂跑，馬路如虎口」，呢首歌仔唱咗幾十年，但似乎好多人都參透唔到當中嘅含意，好似青衣呢位女途人咁，就懷疑冇睇清楚過馬路，俾巴士撞倒仲捲咗入車底，見到畫面都嚇親！
一度拖行數米
話說噚日朝早近10點，一架49X九巴，喺青衣長發邨巴士總站上落客之後離開，當駛出20米左右，一位姓黎嘅女途人（49歲）突然由左邊步出，姓唐嘅司機（61歲）收掣不及將佢撞倒。讀者阿Ken當時喺巴士站等車，聽到「嘭」一聲，途人拍門叫司機停車：「你下面捲咗個人呀！」司機大驚即刻停車，但女途人已經被拖行幾米，雙腳屈曲，車長即時開前門畀乘客落車同報警。
阿Ken指：「車長唔知係咪慌張得滯，冇開中門。啲乘客喺前門落，個傷者正正被壓在前門下面嘅車底，咁啲人行落去，會唔會壓到佢呀？」據小記了解，女途人當時並非喺斑馬線過路，現場留低傷者嘅一隻波鞋，同一堆杯碟碎片，巴士左邊車頭玻璃爆裂，估計撞擊力唔輕。
大批消防員接報到場拯救，其中幾個消防員伏喺地上審視情況，之後用工具唧起巴士車身，再小心翼翼將傷者救出，傷者頭、胸、盆骨同腳部受傷、鼻流血，被救出時已經昏迷，由救護員送去仁濟醫院搶救，之後再轉送瑪嘉烈醫院做手術，情況危殆。
九巴發言人回應，噚日朝近10點左右，一架49X線巴士喺青衣長安巴士總站埋站後駛出，一名女途人突然走出馬路，車長馬上閃避，巴士左邊車頭撞倒女途人，傷者受傷送院。九巴已派人到醫院慰問，並會配合警方嘅調查工作。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。