下個星期係十˙一中共建政日，例牌又會有煙花匯演啦！警方估計會有27萬人喺維港兩岸觀賞，不過今年除咗可以喺維港兩岸睇，仲多咗一個地方選擇，就係啱啱啟用嘅西九高鐵站！
天空走廊成熱點
之前運房局局長陳帆講過，話西九高鐵站係睇煙花嘅好位置，𠵱家高鐵站已經開放，八方估計當日去高鐵站睇煙花嘅市民，隨時多過去搭高鐵嘅旅客。
噚日警方講十˙一煙花匯演交通安排，西九龍總區交通部執行及管制組警司鍾雄業都話，去高鐵站睇煙花嘅市民會唔少，佢估計比較多人係站內天幕頂嘅「天空走廊」睇煙花，又相信港鐵職員會管理秩序，所以警方暫時唔會係附近做封路措施，警方今年會同以往一樣，放煙花前會喺當晚7點起，喺尖沙嘴同灣仔海旁一帶實施大範圍封路，所以呼籲大家盡量使用公共交通工具前往觀賞煙花。