政府今個星期一刊憲禁止主張港獨嘅「香港民族黨」運作，建制派隨即發表聯合聲明反港獨，但最奇係話自己係「中間派」嘅醫學界議員陳沛然（圖）都簽埋一份，佢走去同建制派做「同路人」嘅舉動，辣㷫唔少業界選民，陳沛然亦知大鑊，繼前日致歉後，噚日佢再喺fb宣佈退出建制派聯署。
網民鬧爆：醫返都冇用
其實聯署事件曝光後，真普選醫生聯盟成員黃任匡即時喺網上炮轟陳沛然，鬧佢事前冇進行民調同諮詢業界意見，更質疑陳是否已暗地歸邊，而陳前日曾經發聲明回應，承認因一心反港獨而倉促同意聯署，又對自己做法令部份同業產生疑慮深表歉意。
不過，佢嘅聲明仍未平息到爭議，有網民就話睇咗佢篇《澄清》，如果無跟進動作退出聯署，恐怕越澄越唔清，另有網民繼續鬧佢「醫返都冇用」，而黃任匡亦留言，要求陳出份公開信，正式退出聯署，以正視聽。面對選民唔收貨，陳沛然噚日再透過fb宣佈，退出建制派發出嘅聯合聲明，但重申反對港獨，並指會竭力維護根據《基本法》第二十七條賦予港人嘅各項權利同埋自由，而立法會教育界議員葉建源同歐陽英傑（星屑醫生）like咗陳嘅帖文，其中歐陽英傑留言：「一直對你有信心，你無令我們失望，加油。」