928「佔鐘」，夏慤道發射87砲催淚彈的震撼畫面，原來已經離大家四年咁遠。傘後四年，香港無穿無爛，但人心悶翳，催淚彈在心口炸開的陰霾，四年不散。聽高鐵高層官腔解讀水桶陣，他們說：「個站咁大，漏水好少啫」。同樣角度，傘運被鎮壓，參與者被擊倒，被拉被控，79天的能量無法再延伸，個運動牽涉咁多人，失聯、降溫繼而冰凍或者無力感泛濫，都係平常。參與的過百萬人次，高過首日趁墟坐高鐵攞彩的乘客。投放近九百億公帑不斷硬銷一小時生活圈的高鐵，兩三日後，搭乘量大跌，得番四成。傘運後，堅持擔遮落區的傘兵，四年後，有冇剩低四成？抑或，已經高估了？
山竹襲港十號風球連掛十粒鐘的翌日，佔中九子上庭，九人一字排開合照，齊晒腳，唔使key圖，他們比急着上班被塌樹阻路的打工仔幸運了一點，沒有遲到。九人可是迎接遲大到的檢控，磨蹭四年的官非，如果它是一場風暴，很明顯全世界找不到這種慢N拍的颶風。它可怕在，官司龜速但強度能摧毀壯志。山竹過後，香港人自助自救。佔鐘四年後，失望交叉絕望的傘民，塌樹下，點一盞燈，銘記87砲煙。