四年前傘運催生咗唔少「藍絲」組織，但齋講唔做都冇乜意思，八方喺9.28前為佢哋埋單計數，睇吓邊個組織開工最密最勇武，最值阿爺放水領功勞，結果「愛港之聲」、「幫港出聲」和「保衛香港運動」最勤力，成立至今見報次數位列三甲；近年冒起嘅「珍惜群組」就最勇武。
港大學者戴耀廷2013年初刊登文章談及公民抗命爭取普選後，唔少藍絲組織相繼成立，「收工男」傅振中牽頭嘅「保衛香港運動」同年6月誕生、周融牽頭嘅「幫港出聲」8月登場；由商人高達斌成立嘅「愛港之聲」更於2012年底已經成立，除支持梁振英，多次開工反佔中。
《蘋果》用「慧科搜索」引擎統計，發現多個藍絲組織由成立至本月初，被報道次數逾千次，其中「愛港之聲」、「幫港出聲」和「保衛香港運動」開工次數較多，於香港媒體被報道次數分別為2,537次、2,220次和1,352次；除咗因為反佔中見報，近年因「港獨」議題又有機會開工。
「珍惜群組」最勇武
要領功除咗可見報，或者要表現勇武，部份藍絲組織過去曾因「過激」表現被捕。例如2014年戴耀廷發起和平佔中嘅「商討日」，有「愛港力」男成員踩場時曾因向市民潑水，遭警方拘捕。但若論最多人被捕，則非「珍惜群組」莫屬，羅冠聰去年1月由台灣返港期間就被該組織成員襲擊，警方其後拘捕屬該組織嘅3人。今年1月「珍惜群組」成員郭綺華則因喺東區裁判法院外辱罵判處朱經緯擊傷途人罪成的女法官，被警方以涉嫌藐視法庭罪拘捕。過去多次同上述組織交手嘅梁國雄話，有關組織同中共主張「群眾鬥群眾」策略，以及前特首梁振英任內主張與民主派鬥爭有關，尊重唔同人不同意見，但睇唔過眼有人用維穩費去組織鬥爭行動。
李八方
