「行李門」事件擾攘兩年，隨着空勤人員一方勝訴而告一段落……就奇嘞，皆因主角之一嘅前特首梁振英似乎唔服輸，再三喺facebook狙擊香港空勤人員總工會理事吳敏兒，繼之前話對方以政治立場凌駕常識後，再喺facebook發文話對方誤解判詞，仲要求吳回答三大問題。
屢屢利用鍵盤力量發表偉論嘅CY，文中形容吳敏兒係「空中服務員兼激進工會頭面人物」，批評對方繼續喺法官判詞上誤導，先列出同繙譯部份判詞，強調法官接納相關「酌情送遞」服務，其後連續三問，包括「法院有說『酌情送遞』是只為吳敏兒口中的『權貴』服務嗎？有說我或我的家人向機管局或航空公司要求特權嗎？」等。
第三問明顯係重點，佢要吳敏兒回答至今營造嘅事實，「是我行使行政長官的特權，或利用行政長官的職務，危害到當晚航班的航空安全，是/不是？」原來CY擔心外界以為佢利用特權危害當晚航空安全，之但係法庭已經裁定空總勝訴、機管局違規，CY係咪使用特權？唔使吳敏兒答，公眾都有眼睇。