𠵱家足球比賽咁多，一星期踢兩至三場屬家常便飯，球員長期做「空中飛人」，隨時捱壞身子，但如果你係皇家馬德里球員，就唔同講法！
皇馬同阿聯酋航空簽下贊助合約多年，平時坐嘅A380空中巴士都豪華過人，傳媒最近大揭秘呢架價值3.4億鎊（約34億港元）的客機頭等艙有幾豪華，大爆卻奧斯、沙治奧拉莫斯同加里夫巴利等球星，平時喺空中嘅生活唔比陸地上差。
首先，每位球員都有一間獨立浴室，飛機上有個大bar台，機上有服務人員負責提供酒水。最重要係，每個球員嘅私人座位都可以變成床位，而且有一部可以收到2,500個頻道嘅平板電腦，以及一個小衣櫃畀球員放私人物品。
不過，呢種帝王式享受原來唔只得皇馬受惠，事實上只要同阿聯酋航空簽約嘅球會，都可享用同樣嘅空中服務，包括阿仙奴同巴黎聖日耳門，只係以成績嚟比較，似乎為皇馬安排服務，是物有所值，皆因球隊已經連續三年稱霸歐聯。