特首林鄭月娥（圖）上周三出席《東周刊》頒獎禮致辭時，話《東周》能否做到經典品牌特質，要「拭目以待」，呢番話梗令《東周》高層唔多開心，但人稱炒何嘅老闆何柱國「點醒」佢哋，難得娥特「零舍關心」，《東周》同仁應該「與有榮焉」。
其實周一出版嘅《東周》已登咗一整頁嘅專欄回應娥特，屬同一集團嘅《星島日報》噚日喺「架勢堂」欄目再出招，話炒何回應娥特嘅贈言，「何主席話如見阿媽倍感關愛」，又反問覺得被娥特揶揄高層：「聽到特首咁講，有無特別溫暖？」繼而指呢班高層水平低，前三任特首都冇咁關心《東周》，又話特首邊得閒揶揄一本周刊？強調「你哋應該感到溫暖，晚上瞓覺都應該瞓得開心啲，瞓到半夜都識哈哈笑。」而「哈哈笑」呢三粒字係用紅色兼BOLD大咗。唔知點解八方聽起嚟，只覺話中有意？