政府前日刊憲將香港民族黨打成非法社團，但似乎未必嚇到港獨派支持者，好似月初喺facebook開設專頁嘅「香港共產黨」就同日發文，話受習近平思想感召，去信保安局通告要正式立黨，仲講明唔排除武力起義，「實現香港推行共產主義」喎。好多社運人覺得呢單嘢似玩膠多過真心，究竟係邊個搞出嚟？原來同楊繼昌有關。
楊繼昌認係搞手
香港共產黨專頁帖文聲稱受習思想感召，黨綱以中國共產黨黨章為藍本，「堅決反對香港基本法有關實行資本主義制度的條文」，仲去信通知保安局長立黨，話如果局方唔覆就當唔反對，到佢哋11月派人去九西補選，就會以保安局默許為由，叫選舉主任承認候選資格。
究竟香港共產黨邊個搞？有人記得2016年同本土力量何志光合組名單選九西嘅楊繼昌發表過〈如果港獨派成立「香港共產黨」〉文章，估計係佢搞；佢接受「香港01」訪問亦承認係搞手之一，但有熟佢嘅社運人話，佢之前搞香港民進黨好快就冇咗件事，今次應該都好快冇影。
李八方