近年極度重視公關形象嘅解放軍駐港部隊又有新搞作！據知佢哋個官方微博賬號噚日獲新浪微博正式「加V」認證，原本個名為「HONGKONG捍衞」，晏晝改咗做「駐香港部隊」，仲發出首條帖文，片文並茂咁介紹駐港部隊。
承認「特別講政治」
呢條1分鐘短片中，駐港部隊特別形容自己係「特別講政治」、「高度重使命」、「嚴格守法紀」，仲話官兵明明「顏值爆棚」，但因為「職責與精神」，要做香港嘅「定海神針」，有冇咁肉麻到打冷震？
文字介紹亦貫徹「為你我受冷風吹」作風，形容將會介紹駐香港部隊官兵「燃爆荷爾蒙」嘅軍事訓練同埋「軍味泥土味」十足嘅日常活動，仲話官兵都係顏值爆棚嘅「小哥哥、小姐姐」㖭！之不過打冷震之餘，八方都好關注究竟呢班官兵嘅顏值如何？有片有真相，八方只能勸大家絕對唔好抱有期望，似乎喺顏值方面，同駐軍中人有好大落差。