土地大便論接近尾聲，政府如廁出恭，市民幫手擦屁，強權新常態，無乜好拗。填海填海填海，比洗手洗手洗手更入肺。唱好填海的才俊當市民stupid，唔該啦，搵多N個理由好冇。冇理由嗎？民間幫埋你搵：
填咗個海佢（當然淺水灣那些唔屬於海，係灣）最安全，海水溫度上升，助長超強颱風生成，填咗海，山竹都會變肉餅，打工仔從此冇風假，停工要等第二世。
填咗個海佢，陳帆就不能潛水，只好借尿遁或者尿住褲子，跟自己的一人團隊「夙夜不眠」。點解救災無影？市民理解，陳局長一褲都係，緊急洗「底」。
填咗個海佢，冇人再記得港珠澳大橋飄移的弱波石。條條大路通大灣區，無個海阻住，香港人只要識毅行，見樹爬樹，見水即抽，唔使預早一個鐘去西九，慳皮好多，林鄭可以慳啲。
填咗個海佢，用來起N個高球場，相關從業員，肯定飆升上柒百萬！全港幫高球場打工，創造全民就業，百分百獅子山奇蹟！