大家可能都聽過或遇過「人肉霸車位」事件，周日喺淺水灣，有市民目擊一個着短褲嘅女人用沙灘椅同雜物幫架平治霸位，搞到其他司機有位都冇得泊。有人睇唔過眼向《蘋果》爆相爆片，記者發現部平治原來係立法會議員張華峰所擁有，平治男係張華峰嘅親戚，但唔通因為有人係尊貴嘅議員，認親認戚就大晒？
市民張先生喺周日下晝揸車到淺水灣泳灘嘅停車場，當時停車場近乎爆滿，但咁啱有一個吉位。張先生於是駛埋去準備泊車，但就發現一個着T恤短褲嘅女人企喺度人肉霸位，個女人仲擺咗沙灘椅喺度。張先生話佢曾經好禮貌咁叫呢位短褲女行開，但對方拒絕，仲話佢嘅朋友揸緊架車過嚟泊呢個位。
張華峰：有啲誤會
結果張先生就同短褲女拗起上嚟，拗拗吓附近有另一架車離開，張先生於是將車駛過去泊咗就算。不過之後有另一位司機，同樣想泊短褲女霸住嗰個車位但無得泊，呢位司機索性將部車打橫頂住個車位入口。就喺呢個時候，短褲女嘅男性朋友終於出現，佢身形有啲肥，揸住部價值成百萬嘅黑色平治S500L房車。
呢位平治男可能以為有人幫佢人肉霸位，實食冇黐牙，點知嚟到見有部車頂住，一樣冇得泊。雙方僵持不下，過咗一段時間，現場再有其他車離開，結果佢哋都有位泊。張先生批評人肉霸位太自私，認為咁嘅風氣唔可以助長。
記者其後都有到場了解，仲見平治男同短褲女返番去泊位入咪錶，於是追問平治男話有市民唔滿意佢哋人肉霸位，但平治男只係答：「我唔係好清楚你講緊啲乜嘢。」記者事後向張華峰查詢，佢嘅助手回應證實平治男係張華峰嘅親戚，用咗張華峰部平治，但由於事發時張華峰唔在場，所以唔清楚情況，唔排除「有啲誤會」喎。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。