祖雲達斯巨星基斯坦奴朗拿度（C朗），上個禮拜三歐聯攞完紅牌爆喊後，去到禮拜日嘅意甲，就喺完場前九分鐘幫祖記射入先開紀錄嘅一球，加埋隊友貝拿迪斯治埋齋，祖記驚險作客2:0贏費辛隆尼，意甲五戰全勝，而且C朗都連續兩場聯賽有波入，應該笑番晒啦！
撥走上周領紅陰霾
C朗喺上個禮拜嘅聯賽，搵到佢加盟祖記後嘅開齋入球，仲打孖嚟幫祖記2:1險勝薩斯索羅，不過去到上個禮拜三，祖記喺歐聯分組賽作客華倫西亞，C朗就因為拍一拍對手個頭，有拉扯到對方頭髮嘅嫌疑，拎咗佢喺歐聯生涯嘅首張紅牌，搞到33歲嘅C朗喺場入面爆喊。
返到聯賽，祖記今場排出4-3-1-2嘅新陣式，C朗拍住文迪蘇傑打雙箭頭，保羅戴巴拿喺身後支援，加埋安利簡恩、賓坦古亞同比真歷三個中場中，兩條邊路就交晒俾翼衞古達度同阿歷斯辛度，呢個新陣式下祖記攻勢威脅唔太夠，要去到81分鐘，C朗喺幾次失機後，終於近門射入開紀錄。
去到補時階段，C朗策動反擊，交波畀左路嘅比真歷，再橫傳入禁區由後備入替嘅翼鋒貝拿迪斯治射成2:0，幫助祖記保住意甲五戰全勝，三分領先次席嘅拿玻里，兩隊嚟緊嘅禮拜六，就喺祖記主場踢榜首大戰。
po相+意文留言打氣
C朗賽後就擺咗相上網，話祖記又贏到重要嘅一場，叫大家繼續努力咁話！教練艾基利就話：「我哋上周中有成70分鐘十人應戰，體力好大考驗，都預咗今場會苦戰。我哋嘅變陣效果麻麻，所以我將比真歷同古達度推前，靠晒安利簡恩屏障防線，而貝拿迪斯治後備入替都踢得好好，幫球隊提供到需要嘅闊度。」C朗賽後喺佢ig上載一張今場波有佢份嘅比賽相片，用意大利文話：「Un’altra importante vittoria! Avanti cosi ragazzi, tutti insieme!（另一場重要勝仗！大家繼續團結一心）」（圖）
不過，自從C朗加盟後，正選位置都保唔住嘅保羅戴巴拿，今場就把握唔到機會說服艾基利喇，教練再次話佢表現麻麻：「戴巴拿需要更多比賽時間重拾狀態，目前唔使為此緊張。」
呢邊廂祖記就如入無人之境，但佢哋以前嘅大敵AC米蘭，同日意甲就喺聖西路主場兩度領先下，畀阿特蘭大喺補時逼和2:2，踢咗四輪聯賽只得一勝，排緊第13位。