噚日係中秋節，好多政界人士都喺社交網貼相貼圖賀中秋，但竟然有人貼完圖之後，令唔少網民「嘩」一聲，幾乎以為噚日係Halloween！點解會咁？就要由民建聯蔣麗芸嘅「嫦娥下凡圖」講起。
話說就喺噚晚人月兩團圓，大家準備同屋企人團聚食飯做節之際，有人傳一張「嫦娥」抱住月兔，下凡同大家講咗句：中秋節快樂！呢張元秋嘅「嫦娥下凡圖」好快就成為政圈熱話，佢嘅粉絲當然會大讚佢「有心思」，但更多人傳畀其他人嘅時候，唔知有心又好、冇心又好，必加一句「不能只有我看到」、「殺咗我喇」，其中輾轉間得悉「嫦娥」落入凡間嘅立法會議員新同盟范國威可能睇見張圖咁似海洋公園哈佬喂公仔，就意有所指話「今日係中秋節，唔係萬聖節」，唔知立法會下個月復會，元秋會唔會去找咖喱飯晦氣？
邵家臻emoji九成似
同樣貼賀中秋圖，另一立會議員邵家臻簡單得多，佢同元秋一樣將自己個樣融合入卡通入面，整個戴住眼鏡嘅鬍鬚月亮賀中秋，八方睇落真係有八、九成似邵家臻嗰樣，再加埋佢嗰句自嘲式賀中秋貼文，「腩到中秋份外圓，祝各位中秋節快樂！」網民讚唔讚都好，起碼唔會好似元秋咁搞到大家以為噚日係Halloween！
李八方