前日高鐵第一日正式通車畀市民搭，除咗一眾高官出力唱好，親北京嘅傳媒更加不遺餘力吹噓高鐵首日幾受港人歡迎，其中早排先搞創刊70周年酒會、被一班達官貴人大讚又客觀、又持平、又正面、仲要日日睇嘅《文匯報》，就用好多版大讚高鐵幾咁受港人歡迎，頭版更加用「高鐵Go Go Go 市民High High High」做大題（圖），雖然又中又英，但香港本土文化一向中英夾雜咁用，都冇問題嘅，但好快有網民發現，呢條題點解好似熟口熟面？
跟住有網民搵到，呢兩句題同「廟街歌王」尹光一首好多年前好流行嘅K歌「少理阿爸」一啲歌詞好似，仲有人貼埋歌詞，話同呢句「冚家HIGH HIGH HIGH，我同你講嘢氣都嘥，爸爸YO YO YO，吖少理阿爸正X街」好雷同。其實尹光嘅歌都係香港通俗文化嘅一部份，香港中央圖書館都舉辦過「香港音樂家群像系列︰廟街歌王──尹光」展覽，就算雷同都冇乜大問題嘅，不過《文匯報》作為咁多建制派吹捧嘅報紙，《文匯報》又鍾意批評民主派議員抗爭又粗暴、又冇文化，突然有一條同尹光嘅歌咁雷同嘅題去讚高鐵，好多網民接受唔到兼忍唔住笑啫。