近期政圈花生指數最高嘅八卦事，當然係《星島》集團老闆、身為全國政協常委嘅何柱國，喺上周《東周刊》舉辦嘅「香港經典品牌」頒獎禮同特首林鄭月娥就打擊「港獨」同搵地建屋唇槍舌劍。娥特當日還拖之時，仲對《東周刊》有「提點」，佢致辭稱品牌要有三個特質：credibility（可信）、reliability（可靠）同adaptability（與時並進），又話《東周刊》未來能否滿足呢三個要求，要拭目以待。好多人估《東周刊》會唔會還拖呢？
《東周刊》果然冇令花生友失望。噚日出版嘅《東周刊》就喺【政官莊】欄目，刊登題為「衷心感謝特首訓話」嘅回應（圖），文中話「本刊特別感謝特首的訓話」，強調《東周刊》復刊以來一直堅守專業，其間特首都換咗四任，佢哋都經歷咗當中風風雨雨，起起落落，《東周刊》就屹立不倒，「正因為有公信力，報道真實新聞，所以才得到讀者的認同及信任」。留意番，「讀者的認同及信任」呢幾粒字，《東周刊》特別bold大同間橫線，而總結時仲話「未來，《東周刊》必更加鞭策自己，堅守本份，努力前進」，「堅守本份」四粒字同「讀者的認同及信任」，有同等嘅刊登「待遇」，呢次會唔會成功引起娥特高度關注？