目擊市民張先生留意到部平治嘅車牌係「BL 1X3」，但平治車頭擋風玻璃上面就貼咗張立法會停車場泊車證，泊車證印住「SL 34X4」車牌，同平治車牌唔同。根據車牌登記資料，無論「BL 1X3」定「SL 34X4」，登記車主都係立法會金融服務界議員張華峰名下嘅同一間私人公司，但「SL 34X4」喺舊年年底已經停止登記，咁究竟係咪有人濫用立法會泊車證呢？
張華峰助手向《蘋果》承認，貼喺平治上面嗰張立法會停車場泊車證，其實原本係屬於另一架舊車，但部車已經劏咗，可能有人貪方便，將張立法會停車場泊車證貼喺平治上面，已經要求立即銷毀嗰張泊車證。
立法會秘書處就回應話，根據立法會大樓停車場嘅使用條款，議員可以申請多於一個停車證，亦可以用非議員本人名義登記嘅車輛車牌號碼，申請停車證，但議員須作出聲明有關車輛係佢本人使用。立法會停車證唔可以轉用，若議員唔再使用停車證，須歸還秘書處。