兩個幾月前退出民協另組壓力團體嘅馮檢基，早排表明若果劉小麗喺11月立法會九龍西補選未能入閘，佢就會去馬參選。自言勝算高嘅基哥唔知係咪政綱都有埋，仲率先提出要關注年輕政治犯，話自己係太平紳士嚟㗎，可以探佢哋，仲話旗下社企可以作為呢班後生仔日後重投社會嘅踏板。
話說基哥前晚接受網名無敵神駒嘅本土派人士仇思達邀請，喺對方網台大談九西補選。大家都知神駒係教主黃毓民支持者，教主當年亦成日開咪鬧基哥，今次神駒同基哥有傾有講，咪話唔新穎！基哥喺節目上冇乜點鬧政府同建制，反而開足馬力鬧爆劉小麗「欽點」工黨李卓人做Plan B係反民主。
忽然關注政治犯稱想探監
基哥又提到關注年輕政治犯問題，批評前特首梁振英故意引用暴動罪控告佢哋，為佢哋無端端坐多幾年監不值，又話佢哋坐咁耐，將來點呢？本身係太平紳士嘅基哥話，有機會想去探望呢啲在囚後生仔，仲請主持幫忙聯絡，又話希望喺當中搵啲投入、愛香港嘅人，加入佢搞嘅社企同壓力團體，幫佢哋日後謀生咁話，話自己搞過4間社企，請過百人㗎！其實政治犯議題今年初初選時好hit，但當時基哥反而冇乜講喎！