高鐵通車，達官貴人排住隊出嚟撐，但一被人問會唔會坐高鐵返大陸開會？包括林鄭等權貴，個個話趕時間，多數坐飛機未必坐高鐵，不過八方明嘅，佢哋身份點尷尬都要硬撐，就正如「大嘥鬼」噚日喺facebook出po，都要用減低碳排放撐高鐵好過飛機，班網民又好衰，留言踢爆阿鬼，知佢唔撐唔得，否則鬼鬼可能連工都冇埋。
大嘥鬼噚日以「低碳出行記」為題發帖，佢都好醒一早戴晒頭盔，話明白「高速鐵路喺網上有好多唔同嘅討論」，但都要講高鐵嘅碳排放量，只係飛機嘅十分之一，對比喺路面上行走嘅跨境巴士產生嘅碳排低。佢仲驚頭盔戴得唔夠穩，臨尾加一堆#只談碳排放、#能源耗用量嚟講正常係慳咗、#鐵路以電力為能源所以污染較低等hashtag，明顯怕俾人插。
網民︰食咗咁大隻死貓
網民都好體諒，有人留言「鬼鬼，我知你收order 做嘢我唔嬲嬲你，但係你班老細上北京都唔幫襯高鐵而要搭飛機又點計數先？！」「鬼鬼要唔要紙巾……丫唔係，手巾抹眼淚呀？話晒食咗咁大隻死貓」。