因咩事要打司機仲要打埋警察？有巿民前晚10點途經銅鑼灣駱克道507號對開街頭，見到一個滿身酒氣嘅男人，突然喺附近的士站跳上一架冚旗的士，當時司機表明唔載客，個男人唔知係咪發酒癲，先發爛渣施展李三腳踢車門，當司機走出嚟交涉時，醉酒男仲要火氣暴升，出手打傷埋司機，途人見狀報警。
警方接報到場，醉酒客唔服氣，一路力抗警察制服，一路大罵，結果俾兩個警察合力將醉男㩒喺地下，反手屈喺背後，用手銬鎖上雙手帶走，件事先可以解決，圍觀途人亦逐漸消散。
警方表示接報有人喺前晚10時許拍打的士車門，同襲擊65歲姓馬司機，警方到場拘捕一個64歲姓黃男人，其間一名警員俾人毆傷，疑犯涉刑毀、襲警及普通襲擊被捕，司機同受傷警察事後手傷及心口痛，送往律敦治醫院治理。