日本國家隊早前對智利嘅友賽雖然因為地震取消，但新教練森保一（圖）喺球隊由札幌返大阪班機上就帶頭讓座畀球員，真心抵讚。日本原定喺上個國際賽期喺北海道友賽智利，但因賽前北海道大地震，搞到場波取消。據日媒《Number》報道，日本喺9月8號前要飛大阪準備對哥斯達黎加嘅另一場友賽，不過班機得20個商務座位，日本主帥森保一就主動轉坐經濟艙，將商務位讓畀需要更好休息嘅球員，堂安律等小將都有樣學樣。
至於日職方面，榜首嘅廣島三箭上周六主場迎戰第三位嘅FC東京，主隊雖然有射手安達臣奧利華拉先開紀錄，不過下半場東京就有連斯利馬扳平，結果雙方賽和1:1。