費Sir返嚟喇！曼聯傳奇領隊費格遜爵士再次重返奧脫福！費爵爺喺今年五月接受腦部手術之後，上周六第一次返番奧脫福球場，欣賞曼聯主場鬥狼隊嘅英超比賽。家陣76歲嘅費爵爺早前因中風導致腦出血，喺五月做咗手術，之後院方為佢進行人工昏迷，到六月出院。
費Sir出院後亦都拍過短片多謝院方，亦表示自己嘅身體已無大礙。費Sir喺比賽當日嘅中午時分就抵達奧脫福，外表睇落佢老人家精神相當唔錯喇。曼聯會方亦隨即透過官方社交網站歡迎費Sir老人家再次光臨夢劇院：「Welcome back to Old Trafford, Sir Alex.（歡迎回到奧脫福，費爵爺。）」
至於上周六英超早場富咸主場迎戰屈福特，主隊喺比賽兩分鐘就落後，屈福特嘅安達格雷把握富咸守衞失誤射成1:0。但到咗下半場，富咸嘅塞爾維亞射手阿歷山大米祖域就成功追和，最終打成1:1平手，各得一分。